Les mots surlignés font l'objet d'une note
1Reçue à Crest, le 11 mai 1573. Répondue 12 mai 1573.
2Monsieur de Gordes, estant le sieur de La Roche, capitaine de Graine, près de moy
3en la presente armée, où il est venu avecques la compaignye de mon cousin le
4duc d'Uzès, de laquelle il est homme d'arme suivant le commandement qui luy
5en a esté faict, il ma adverty que soubz coulleur quil auroit esté de
6la nouvelle relligion et quil se seroit trouvé absent de sa maison lors
7de la publication de l'edict faict parle roy, monseigneur et frère, ou moys
8de decembre dernier, on auroit procedé à la saisie de ses biens et estat
9desquelz on ne luy veult donner main levée que premierement il ne se soit
10presenté par devant vous suivant icellui edict; et dautant quil est en ceste
11armée, y faisant actuellement service et vivant catholicquement en lobeissance,
12fidellité et affection quil doibt au service du roy mondit seigneur et frère,
13ne pouvant pour ceste occasion vous aller trouver par delà; pour cest effect,
14je vous ay bien voullu escripre la presente en sa faveur pour vous prier de faire
15en sorte envers messieurs de la court de parlement de Grenoble quilz ayent
16à le remectre incontinant en la joyssance de ses estat et biens, et luy en
17bailler main levée, suivant lintention du roy, monseigneur et frère, encores quil
18ne se soit présenté par devant vous; dont je vous prye de lexcuser, dautant
19que je ne luy veulx donner congé de vous aller trouver, congnoissant le bon
20zèle et affection quil a maintenant au service de sa majesté, principallement en occasion
21si importante comme est celle-cy de la reduction de La Rochelle. Et outre que ce sera
22donner occasion à beaucoup dautres de se desister de leurs maulvaises intentions,
23vous ferez chose que le roy, mondit seigneur et frère et moy aussi, aurons
24très agreable. Priant à tant le Createur vous avoir, monsieur de Gordes,
25en sa sainte et digne garde. Escript au camp devant La Rochelle, le XXXe
26jour de mars 1573
27votre bon amy
28henry